യുവജന കമ്മീഷനിലേക്ക് ലഭിക്കുന്ന പരാതികളിൽ ഏറെയും ഗാർഹിക പീഡനങ്ങളും സ്ത്രീധന പ്രശ്നങ്ങളുമാണ്: ചിന്ത ജെറോം

തിരുവനന്തപുരം: സംസ്ഥാനത്ത് ജെൻഡർ വിദ്യാഭ്യാസം പാഠ്യപദ്ധതിയിൽ ഉൾപ്പെടുത്തുന്നതിന് സർക്കാരിലേയ്ക്ക് ശുപാർശ ചെയ്യുമെന്ന് യുവജന കമ്മീഷൻ ചെയർപേഴ്സൺ ഡോ.ചിന്ത ജെറോം. പ്രണയ നൈരാശ്യവും തുടർന്ന് ഉണ്ടാകുന്ന അക്രമങ്ങളും കൊലപാതകങ്ങളും വർദ്ധിച്ച് വരുന്നത് തടയിടാൻ യുവജന കമ്മീഷൻ കാമ്ബസുകളിൽ ബോധവത്കരണം ഉൾപ്പടെയുള്ള പ്രവർത്തനങ്ങൾക്ക് നേതൃത്വം നൽകുമെന്നും ഉന്നത വിദ്യാഭ്യാസ വകുപ്പുമായി സഹകരിച്ച് കലാലയങ്ങളിൽ ജെൻഡർ എജ്യൂക്കേഷൻ കാമ്ബയിൻ സംഘടിപ്പിക്കുമെന്നും ചിന്ത ജെറോം വ്യക്തമാക്കി.

‘യുവതി യുവാക്കളെ കൂടുതൽ ആകർഷിപ്പിക്കുന്നതിനും പദ്ധതികൾ തയ്യാറാക്കും. യുവജന കമ്മീഷനിലേക്ക് ലഭിക്കുന്ന പരാതികളിൽ ഏറെയും ഗാർഹിക പീഡനങ്ങളും സ്ത്രീധന പ്രശ്നങ്ങളുമാണ്. വിസ്മയയുടെ കൊലപാതകത്തിന് ശേഷം മാത്രം നൂറിലേറെ പരാതികളാണ് സംസ്ഥാനത്ത് സ്ത്രീധന പ്രശ്നവുമായി ബന്ധപ്പെട്ട് കമ്മീഷന് ലഭിച്ചത്.

ഇവ മേഖലകളാക്കി തിരിച്ച് പരിഹരിച്ച് കൊണ്ടിരിക്കുകയാണ്. ജില്ലയിൽ ഇന്നലെ നടന്ന അദാലത്തിൽ 22 പരാതികളാണ് ലഭിച്ചത്. ഇതിൽ 16 എണ്ണം തീർപ്പാക്കി. പത്ത് പുതിയ പരാതികൾ സ്വീകരിച്ചു’- ചിന്ത ജെറോം വാർത്താ സമ്മേളനത്തിൽ പറഞ്ഞു.