സംസ്ഥാനത്തെ കോളേജുകൾ ഇന്ന് വീണ്ടും തുറക്കും, അറ്റൻഡൻസ് നിർബന്ധമാക്കില്ലെന്ന് ഉന്നത വിദ്യാഭ്യാസമന്ത്രി

തിരുവനന്തപുരം: ഒന്നര വർഷത്തെ അടച്ചിടലിന് ശേഷം സംസ്ഥാനത്തെ കോളേജുകൾ ഇന്ന് വീണ്ടും തുറക്കും. അവസാനവർഷ ഡിഗ്രി, പി ജി ക്ലാസുകളാണ് ഇന്ന് പകുതി വിദ്യാർത്ഥികളുമായി പുനരാരംഭിക്കുന്നത്. ഒന്നര വർഷത്തിന് ശേഷമാണ് ക്ലാസുകൾക്കായി കോളേജുകൾ തുറക്കുന്നത്. കർശന കോവിഡ് പ്രോട്ടോക്കോൾ പാലിക്കാനുള്ള നടപടികൾ പൂർത്തിയാക്കിയാണ് കോളേജ് തുറക്കൽ. ഓൺലൈൻ – ഓഫ്‌ലൈൻ ക്ലാസുകൾ ഒരുമിച്ചാണ് മുന്നോട്ടു പോവുക. ഒക്ടോബ 18ന് കോളേജുകൾ പൂർണമായും തുറക്കുകയാണ്.

കോളേജുകളിൽ തുടക്കത്തിൽ അറ്റൻഡൻസ് നിർബന്ധമാക്കില്ലെന്ന് ഉന്നത വിദ്യാഭ്യാസമന്ത്രി ആർ ബിന്ദുപ്രതികരിച്ചു. പാലായിൽ വിദ്യാർത്ഥിനി സഹപാഠിയുടെ കുത്തേറ്റ് മരിച്ച സംഭവത്തിന്റെ പശ്ചാത്തലത്തിൽ കോളേജിലെത്തുന്ന കുട്ടികൾക്ക് കൗൺസിലിംഗ് നൽകുമെന്നും അവർപറഞ്ഞു.

ശ്രദ്ധിക്കേണ്ട കാര്യങ്ങൾ

മാസ്‌ക്, ശാരീരിക അകലം, സാനിറ്റൈസർ അടക്കം കോവിഡ് പ്രോട്ടോക്കോൾ നിർബന്ധം
രോഗ ലക്ഷണങ്ങളുള്ളവർ കോളേജിൽ പോകരുത്
ആർക്കെങ്കിലും കോവിഡ് ബാധിച്ചാൽ സമ്പർക്കത്തിലുള്ളവർക്ക് ക്വറന്റീൻ
കോവിഡ് സമ്പർക്ക പട്ടികയിലുള്ളവർ ക്വാറന്റൈൻ കർശനമായി പാലിക്കണം
ഹോസ്റ്റലുകളിൽ ബയോബബിൾ സംവിധാനം കർശനം
പേന, പെൻസിൽ, പുസ്തകങ്ങൾ, കുടിവെള്ളം, ഭക്ഷണ പദാർത്ഥങ്ങൾ എന്നിവ പരസ്പരം കൈമാറാൻ പാടില്ല.
കൂട്ടംകൂടുന്നതിനും ഒന്നിച്ചിരുന്ന് ഭക്ഷണം കഴിക്കുന്നതിനും വിലക്ക്
സംശയങ്ങൾക്ക് ദിശയിൽ ബന്ധപ്പെടാം – 104, 1056, 0471 2552056