ചാലക്കുടിയിൽ വൻ കഞ്ചാവ് വേട്ട; മൂന്ന് യുവാക്കൾ അറസ്റ്റിൽ, കഞ്ചാവ് എത്തിച്ചത് ആന്ധ്രയിൽ നിന്നും, ലക്ഷ്യമിട്ടത് എറണാകുളത്ത് വിൽപ്പന നടത്താൻ

തൃശ്ശൂർ: ചാലക്കുടി ദേശീയപാതയിൽ നടത്തിയ വാഹന പരിശോധനയിൽ 100 കിലോ കഞ്ചാവ് പോലിസ് പിടികൂടി. കാറിലുണ്ടായിരുന്ന കൊച്ചിക്കാരായ മൂന്നു യുവാക്കളെ പോലീസ് അറസ്റ്റ് ചെയ്തു. ഇതര സംസ്ഥാനത്ത് നിന്നും കേരളത്തിലേക്ക് വൻ തോതിൽ കഞ്ചാവെത്തുന്ന വിവരത്തെത്തുടർന്ന് തൃശ്ശൂർ എസ്പിയുടെ നേതൃത്വത്തിൽ ചാലക്കുടി പോലീസുമായി ചേർന്ന് നടത്തിയ പരിശോധനയിലാണ് പ്രതികൾ പിടിയിലായത്.

ആന്ധ്രാ പ്രദേശിൽ നിന്നാണ് കേരളത്തിലേക്ക് കഞ്ചാവ് എത്തിച്ചതെന്ന് പോലീസ് പറഞ്ഞു. ദേശീയ പാതയിൽ വിവിധയിടങ്ങളിലായി പോലീസ് പരിശോധന നടത്തുന്നുണ്ടായിരുന്നു. ഇതിനിടെ സ്വിഫ്റ്റ് കാറിലെത്തിയ കൊച്ചി സ്വദേശികളായ യുവാക്കളെ പോലീസ് പരിശോധിച്ചപ്പോൾ ഇവരുടെ കാറിൽ നിന്നും ചെറിയ പൊതികളിലാക്കി ഒളിപ്പിച്ചുവച്ച കഞ്ചാവ് കണ്ടെടുക്കുകയായിരുന്നു.

എറണാകുളത്ത് വിവിധ ഇടങ്ങളിൽ വിൽപ്പന നടത്താനായാണ് കഞ്ചാവ് എത്തിച്ചതെന്ന് പോലിസ് പറഞ്ഞു. സംഭവത്തിൽ കൂടുതൽ അന്വേഷണം നടത്തുമെന്ന് പോലീസ് അറിയിച്ചു.